Bärn Bärn Bärn i ha di gärn….
Uf dUhr luege, uf zBähnli seckle, dür dLoube hetze, am Tram uswiche, bim Schiud ga Hose choufe, u so schnäu wi müglech wieder zum Bahnhof.
Nüt vo lädele, nid emau ga käfele. So gah nig öppe i dStadt.
Aber nid hüt. Hüt gah ig aus Turischt. Üse Franz Schafroth erwartet üs am zwöi uf dr Untertorbrügg. DBärnerbrünne wot är us zeige u vone verzeue.
DFigure sigi leider nümme d Originau. Mi heigse kaput gmacht oder si
sig verwätteret. Ds Wasser vo de Brünne heigme früecher zum läbe
brucht aber o, für öppe Bränd zlösche.
Agfange heimer bim Löiferbrunne, de zum Vennerbrunne,
Zähringerbrunne, Ryfflibrunne, Schützebrunne, Pfifferbrunne, Grächtigkeitsbrunne, Chindlifrässerbrunne, Anna-Seilerbrunne, Mosesbrunne, Simonbrunne, u de näbem Wäutposchtbrunne verbi uf dr chline Schanze ga dUssicht uf dStadt u dBärge gniesse.
Dr Franz het viu Intressants gwüsst vo dene Brünne zverzeue. Es hätti öppe no hundert meh vo dene ir Stadt. Aues uswändig, eifach vor Läbere wäg. Mir Manne vom SuisseGym Team heisech gwüss grad e chli müesse ga erhole u si de dür dMättu u düre änglische Garte im Tramdepot glandet. Bi herrlecher Abesunne umenes Bier heimer de dä schön Stadtbummu chönne la setze u är blibt üs i schöner Erinnerig.
Mit beschtem Dank üsem Franz.
Bärn Bärn Bärn du bisch mi Schtärn……